破解男女間的溝通密碼

唔知點解，有時男同女之間總係好似雞同鴨講。你同佢訴苦，佢就嫌你太囉嗦；你好心提醒佢，佢就覺得你多管閒事。究竟係佢唔夠愛你，定係佢從來無好好咁了解你？

唔關事！咁完全係因為男女生嘅思考、表達模式完全唔一樣啫。想破解同佢好好溝通嘅密碼，請細心閱讀以下3點！

溝通秘密1：說話要有重點

男生係以目標為本嘅動物，無論做任何事，都需要明確嘅目標，對事情有所掌握。所以，當你同佢講嘢時，佢要清楚知道對話嘅焦點、目的何在。

女生慣常用嘅溝通模式：
較傾向東拉西扯，諗到咩就講咩，有時未必會有咩焦點。甚至有時，女生仲鍾意俾暗示，測試一下對方。

男生嘅反應：
對住東拉西扯嘅說話，男生會唔知點反應，所以就唔出聲，當你講嘅嘢係耳邊風，又或者敷衍吓就算。

點做好：
清楚直接咁話佢知你究竟想同佢講啲乜，你想佢點。唔好轉彎抹角，到時佢唔理你，你仲無癮。

溝通秘密2：佢只會講出最後答案

對於任何事或問題，男生都鍾意自己靜靜地思考，諗通咗先講出答案或者解決方法。佢哋唔會諗到咩就講出口，因為佢哋怕講錯嘢會好瘀，亦唔鍾意人哋見到佢遇到問題手足無措嘅樣。

女生慣常用嘅溝通模式：
鍾意咩都講出口，一邊諗一邊將自己嘅想法講出嚟。例如同姊妹們plan星期六去邊度玩時，女生們會你一言我一語，咩都講晒出嚟，甚至有啲無謂嘢，明知唔可行都會照講，雖然可能講咗一大餐都得唔到結論，但喺傾偈嘅過程中已經好開心。

男生嘅反應：
男生會覺得點解你有咁多嘢講？你將所有想法講晒出嚟又有咩用？講嘢唔該有point啲！男生只在乎結果，唔在乎思考過程。

點做好：

1.要俾佢知道女生係咁思考嘅，因為你無做錯，同佢講：「同你討論一件事時，我會諗到咩就講咩，我明白你會諗清楚先講出答案，咁只係大家嘅表達方式唔同。」你亦應該留意自己，既然佢鍾意直截了當，可以嘅話就少啲東拉西扯。

2.當你問佢問題時，要俾時間佢諗，當佢諗清楚之後，自然會講出佢嘅決定同答案，唔好迫佢將所有喺腦中閃過嘅想法都同你討論。