貪靚危機！高跟鞋的壞影響

相關內容

• 放大顯示
  貪靚危機！高跟鞋的壞影響

女人，總係敵唔過高跟鞋的誘惑，呢種萬有引力，早喺小女孩時代偷穿媽媽的高跟鞋時，已深深潛伏於地底下。而危機，亦暗暗由腳掌纏上我們。

近年處處可見killer heels，高跟鞋的鞋跟「幼細度」幾如一根長釘，鞋踭設計更越見奇異。但係中咗高跟鞋毒嘅女性人口數字，就有攀升嘅趨勢。

新足潮

近年整形手術喺亞洲廣泛起來，不過喺西方國家，仲多咗做足部整形手術嘅人。有女士為咗擁有心目中嘅完美雙腳，不惜走去削骨、縮小腳趾，希望可以著上佢哋心愛嘅鞋。另外，仲有林林總總針對「美足」而產生嘅手術，如用上激光、超音波技術，仲有注射某類物質進相關部位，以造出不同效果……美國足部整形外科學會曾發表公佈，提醒大家除非足部功能有問題，否則毋須接受足部手術。

愛美的後遺症

一般嚟講，長期穿著5cm以上嘅高跟鞋，有可能引起以下嘅健康問題：
1. 腳趾外翻
2. 引發神經痛
3. 加重關節炎的病情
4. 如果鞋子太緊，會造成關節萎縮，腳趾畸形
5. 影響膝蓋、臀部、脊柱健康

無錯，我哋喺電視、雜誌見容祖兒著住8吋高跟鞋又唱又跳、健步如飛，但理智啲諗一諗，我哋唔係模特兒、明星，而且鏡頭後嘅佢哋，都唔會成日著8吋高跟鞋。

愛足之道

其實一雙腳每日要承受我哋嘅體重已經好辛勞了，如果仲要成日著高跟鞋，向難度挑戰，我哋實在要好好愛護佢。

1. 穿著舒適嘅鞋子返工，如果夜晚要出席重要約會/派對，先換上美美的高跟鞋。

2. 多做腳趾運動，例如身體平躺，抬起雙腿，用脚喺空中寫字，咁樣有助放鬆肌肉。

3. 保持腳部皮膚健康，有助腳部血液循環，預防浮腫，所以要定時為腳部磨砂，去除老化角質，塗上潤膚膏，做好保濕功夫。

4. 買新鞋嘅話，最好喺下午試鞋，因為腳部喺下午會比上午浮腫。

5. 唔好以為著平底鞋就無問題，坊間早已有不少資料指出，平底鞋嘅設計同樣會影響足部健康，不宜經常穿著。而最理想嘅鞋跟高度係2至4cm。