今年度樂壇最後一張成績表《第三十五屆十大中文金曲》頒獎禮昨晚舉行，Eason連奪5獎成為大贏家，祖兒則擸4獎，祖兒與Eason分別第9、8度連任「最優秀流行女/男歌手獎」，兩人堪稱獎王獎后！在總結4台頒獎禮成績，祖兒以13.5獎成為終極大贏家，雖然男友劉浩龍冇到兼食白果，但心情靚爆的她被克勤取笑她嘴角含春！Eason則因四大唱片關係沒有參與《勁歌》，在3個頒獎禮上掃12獎稱霸王！
學友獲榮譽獎
大會頒發49個獎，由於十大金曲獎及「優秀流行歌手大獎」分別多達12個得獎單位，有分豬肉之嫌！雖則今年沒有「金針獎」，但增設了「金曲35周年榮譽大獎」，由歷屆獲最多「十大金曲獎」的歌神張學友獲此殊榮，學友一口氣連唱多首經典金曲！
另外，甄妮以頒獎嘉賓亮相頒獎給祖兒及Eason，與之前鬧爆冇禮貌的鄧紫棋（G.E.M.）首度同場，甄妮寸嘴說：「最緊要打招呼，我返嚟經常有唔同面孔，有時好想打招呼，唔知識唔識驚好面懵！之前少少誤會，使唔使搞到咁大？」她認為歌手修養很緊要：「唔係唱歌唱得好就得，千祈唔好目中無人！」擺明寸爆G.E.M.，大會鏡頭即影住台下歌手，但偏偏未見G.E.M.，未知她是否避席！祖兒從甄妮手上領獎，她表示老師羅文指很難唱得好過《問誰領風騷》原唱者甄妮。而被甄妮點名鬧過的Eason，換來甄妮一句「我好鍾意佢」，Eason甫上台即對甄妮作跪謝狀，甄妮即說：「都係我有教佢教得好先有今日！」Eason也預祝甄妮演唱會成功。
李克勤開齋
連詩雅憑《到此為止》首奪十大金曲獎，流着淚致謝，首度在「中文金曲」獲獎的張繼聰，自爆昨日是與謝安琪結婚6周年紀念。至於陳豪的普通話再度成為笑柄！林保怡指他與陳豪及黃德斌成立了樂隊Sober Band（掃把柄），司儀要求陳豪以普通話示範，他即尷尬地以廣東話說：「掃把柄！」又以普通話說：「我的普通話是OK的！」而以放大假為由的古巨基缺席四台頒獎禮，但昨晚仍獲頒兩獎，但遭DJ暗寸：「有啲歌手考完試又唔攞唔成績表，教壞細路！」至於淡出頒獎禮的李克勤，昨晚開齋連奪兩獎。
祖兒成績卓越，繼續成為女歌手的大贏家。
陳奕迅唱《重口味》時，投訴音樂聲太細。
方大同的《千紙鶴》奪「全國最佳中文歌曲獎」。
克勤（右）難得畀面出席，與Eason惺惺相惜！
Twins悉心打扮，平分秋色。
林保怡（左起）、陳豪及黃德斌的《年少無知》自然入選金曲。
謝安琪不受轉會影響，躋身優秀流行歌手大獎。
學友奪榮譽大獎，實至名歸！
沒有留言:
張貼留言