住宅新盤炒賣絕迹，全城轉為瘋狂掃細細粒嘅劏舖，唔少買家都係炒開住宅嘅投資者，不過舖壇資深投資者黎永滔（滔哥）、黃海明（Michael）同李冠亮（Nelson）都不約而同地同劉Sir講，近排拆場劏舖買家唔少係住宅客，佢哋對工商舖市場認識唔深，入市前要諗清楚，最緊要係盡力而為。
向來唔炒舖嘅滔哥話，美國舊年兩度推出刺激經濟措施，變相加劇通脹，唔少師奶等散戶都話買劏舖收租，查實唔少呢類拆場舖做價已經過晒火位，入市前要做足功課，睇吓個舖值唔值。
黎永滔：遇啱價會沽舖
滔哥仲話，外圍經濟大上大落，零售前景不明朗，一線地舖租金都已見頂，所以依家條街多咗好多吉舖。有代理話，吉咗約一年嘅旺角西洋菜街2J至2Q號地下3號舖，以及銅鑼灣黃金廣場地下一個地舖，上個星期由一個賣水晶精品嘅店舖同時租用，相信係短租，點知幾日前兩間舖又極速變回交吉。
滔哥靜靜雞話，唔少舖壇老手早前已經唔入貨，所以估計今年舖位售價大升空間唔大，佢自己旗下部分中環等舖位，遇啱好價都會賣。
而投資者Nelson表示，唔少拆場買家係住宅投資者，佢哋對商舖買賣流程唔係咁清楚，唔好單睇個舖定價幾百萬元就衝住入市，個別商場內迷你店舖呎價極高，收租回報保證，實質都係羊毛出喺羊身上。
黃海明：今年入市審慎
另一舖壇投資者Michael話，近排拆場舖每方呎做價已幾高，再大升空間唔多，加上銀行一般對商舖按揭成數唔高，大約只係三至四成左右，仲唔係間間做。
不過，始終現時市場資金充裕，Michael話睇怕今年上半年仲有好多拆場，所以散戶入市拆場都要盡力而為。佢自己舊年就用咗14億元買舖，估計今年舖位做價升幅收窄到只有15至20%，所以入市會審慎啲。
唔少財金機構就趁市旺出貨，仲量聯行陳柱衡話，由法國巴黎銀行或有關公司大約十六年前一手購入嘅九龍灣企業廣場第1、2及3座12樓全層連兩車位放售，意向呎價睇7,200元，涉資逾2.9億元。
資深投資者黎永滔認為，一線舖租已見頂，買家炒賣舖位前要做足功課。
黎永滔
沒有留言:
張貼留言