樓市出更：地廠跟風劏埋一份

近排零售物業「劏售」賣個滿堂紅，唔少地廠業主見拆細賣意向呎價一般可以比成件賣貴至少兩成，所以都唔執輸跟風，最近拆地廠嘅個案來自轉型商業區嘅觀塘、九龍灣同葵涌。其中近港鐵站嘅九龍灣順發工業大廈，有個地下部分拆細3個放售，意向呎價約3萬元，估計賣晒可回籠逾4,000萬元，較購入價高逾五成。

有代理同劉Sir講，尖沙咀首都廣場每個舖仔大約300幾至700幾萬元有交易，數日就近售罄，反映散戶錢多，狂搶唔受額外印花稅影響嘅物業，唔少地廠業主有見及此，都「劏」埋一份。

駱駝漆拆細速預留

美聯工商余樹榮話，上述順發工業大廈地下部分總面積約1,500方呎，業主早前諗住成件賣，意向價逾3,500萬元，不少有興趣人士話上址近港鐵站，位置好，單位細啲都無問題，所以業主決定將上址劏成3個地廠賣，面積約300至近1,000方呎，涉資900萬至3,000萬元。

九龍東商廈氣氛愈來愈濃厚，區內地廠亦好搶手，代理報料，投資者今年初以逾2億元買嘅觀塘駱駝漆大廈3期等地下部分單位，早排拆細成超過10個地廠，面積約700至1,400多方呎，意向呎價約2萬至2.5萬元，部分已畀人預留。

另一投資者舊年以2億多元買嘅同區怡生工業中心地下部分，早前亦分成約6個地廠，意向呎價約2.5萬元，地下其中一個就以近7,000萬元賣咗，呎價逾2.3萬元。

首都廣場摸貨拍賣

工廈有價，興勝創建（00896）嘅大角咀新式工廈THE BEDFORD，聽市場消息講，個項目至今已經有10層獲預留，涉及樓層包括中低層同19至21樓單位，最高呎價約7,000元，至於項目頂層連約2,000方呎嘅天台單位，已接受洽購，發展商意向呎價達1萬元，如果賣出將創全港工廈分層戶呎價新高。

另最近火速拆售沽清嘅尖沙咀首都廣場，極速有2個喺2樓嘅摸貨舖位推出拍賣，建築面積分別約64方呎及62方呎，實用面積僅約32方呎及31方呎，本月下旬以350萬元及330萬元開價拍賣，實用呎價逾10萬元。

劉Sir

觀塘駱駝漆大廈地下部分單位，早前拆細逾十個地廠放售。

九龍灣順發工業大廈，最近有地廠業主將所持單位拆細放售。