無綫花旦最近甚「黑仔」！早前跌傷腳的葉翠翠，前晚又在家跣倒，以致尾龍骨骨裂，未能出席後晚舉行的台慶！而楊怡早前拍劇時則拗柴骨裂，但前晚依然「腫」住着高踭鞋出席活動，愛靚唔愛命！
無綫藝員葉翠翠、楊怡及沈震軒齊齊加入「傷追人」行列！翠翠繼今年6月在橫店酒店跣腳致右腳骨裂後，前晚又在家跌親尾龍骨，認真黑仔！她昨午在微博上載X光相，並在電話中講述受傷經過︰「我入房聽電話時跣腳，成個人坐喺地下，Pat Pat落地，當時感到一下裂聲，驚到標冷汗！」
不影響生育
她即時爬去拎電話致電家人求救，送院後發現尾龍骨最後幾節有裂痕︰「醫生話好彩唔係最受力嗰幾節，唔會影響生仔，但要休息一個月先康復，呢幾日唔可以落床。」問到緋聞男友高鈞賢有否安慰，她說︰「佢有安慰我，叫我小心。（會唔會搵你？）冇呀！我出咗院返咗屋企啦！」而高鈞賢則坦言得悉翠翠受傷後唔開心，問到會否探望，他說︰「我會打電話畀佢，睇吓佢點先！」
至於楊怡前晚出席鞋履品牌活動時，右腳踭腫到似「豬蹄」，依然穿上兩吋高踭鞋。她透露拍攝新劇《仁心解碼2》時由高處跌倒受傷︰「之前跌親拗柴，但繼續拍動作戲，睇醫生先知腳踭（骨）裂咗。」對於視后之爭，她坦言睇好自己，問到會否支持緋聞男友羅仲謙，她說︰「唔知佢有冇，如果有會投佢！」曾被拍得與謙仔同車的她，談及吳綺莉早前的車震流言時說：「清者自清，唔好傷害藝人。（之前傷害你？）簡直憤怒！」
同樣受傷的還有沈震軒，他昨日在微博透露綵排台慶時觸及舊患，但仍會如期拍撞車戲，他在電話中說︰「整親左腳韌帶，以前滑雪整傷過，我會要求減少表演危險動作。」
楊怡右腳踭腫起，依然忍痛穿高踭鞋，認真貪靚！
有跌傷前科的翠翠又在家仆親，照X光後發現尾龍骨有裂痕，幸不影響生育！
沒有留言:
張貼留言