袁偉豪手指塞口救Bobby

無綫藝員歐陽震華（Bobby）大年初二晚因急性肺炎被送往ICU，休養數日後好轉，已遷往特別病房。昨日他接受黎芷珊電話訪問時，特別感謝救命恩人袁偉豪，並慶幸搶救12小時後醒得快，否則隨時變植物人！

現年52歲的Bobby，上周一相約多名圈中好友食開年飯，怎料玩至凌晨時分時突然感到不適，大夥見勢色不對，即時Call白車將他送往灣仔律敦治醫院深切治療部（ICU）！Bobby入院後，太太傅潔嫻（Rosanna）及經理人Lydia即時趕往醫院了解，而好友蘇永康、張家輝及關詠荷等亦先後前往探望，Rosanna更一度眼紅紅，十分擔憂。幸休養近一周後，Bobby情況已好轉，並由ICU轉到特別病房，估計本周便可返家休息。昨日，他開腔接受無綫娛樂新聞台記者黎芷珊電話訪問，期間有幾聲咳，要暫停數秒回氣。

反白眼抽筋

Bobby甫開口即向觀眾拜年：「恭喜發財，身體健康！醫生話驗埋血再照埋個肺，冇大礙就可以返屋企休息。」問到昏迷前最後一個畫面，他說：「只係記得成班人喺朋友屋企影緊相，其他就真係唔知喇！之後太太講番畀我知，話我當時一個人行咗去梳化坐低，好似瞌着咗咁，陶大宇以為我醉醉哋同眼瞓，想叫醒我。」他咳了數聲後續說：「佢一推我就見我反白眼同抽筋，好在有好多專業人士包括婦科醫生、警務人員在場，同有個學過急救嘅朋友喺度。袁偉豪（前香港先生、《情逆三世緣》同劇演員）仲好到即刻衝入廁所洗手，然後畀手指我咬，叫我唔好咬到條脷。可能我本身有啲感冒，又飲咗啲酒，一咳就入咗肺，導致昏迷。」

「真係死得o架」

他透露入院時已沒有呼吸能力，要插喉輔助：「真係好辛苦，真係死得o架！由凌晨兩點搶救到翌日下午兩點，一共12小時！真係大命，醫生話我意志力好強，醒得快，否則昏迷時間愈耐會愈危險，可能成為植物人！今次真係死過翻生，要多謝朋友、太太，患難見真情！」對於傳因「暴飲」出事，他說：「酒實有飲，但唔係好多，只不過可能攰攰哋，我拍《情逆三世緣》啲戲份又重啲。」

他還自爆有次開廠，因嗅到強烈天拿水味而心口痛，連牙骹都緊埋，他說：「我仲講笑話如果有事就送我去通波仔，關詠荷仲話我咁衰，邊有咁易死！」

專案組

昏迷入院後，Bobby經過12小時搶救才甦醒，被醫生讚意志力強。

死過翻生的Bobby感激太太支持。

抽筋昏迷
Bobby在梳化狀似「瞌着」，陶大宇一度想叫醒他，其後才發現他反白眼兼抽筋！

洗手施救
危急關頭，袁偉豪還記得衝往廁所洗手才施救，非常注重衞生！

袁偉豪將手塞入Bobby口中，以免他因抽筋而不慎咬到舌頭。