時裝店東炒樓賺千萬

本港樓市屢壓不下，一二手樓價日日鬥癲鬥升，樓價破頂之聲不絕於耳，無殼蝸牛嘆「上車」夢難圓。曾靠炒樓賺逾千萬元的日本時裝店老闆林德財也稱，樓價有排唔會跌，會忍手靜待下一次時機，一於同樓市鬥長命咁話！

林德財一向奉行「取易不取難」的投資哲學，他說：「投資要在無壓力情況下進行，賺錢先至輕易簡單。」○二年他趁樓市低迷購入八個單位，轉手勁賺千萬元！很多朋友事後問他為何無懼樓市低谷？他淡定地答：「平到咁仲驚？投資就係相反理論。」

辦補習社年薪百萬

當時，他因為開辦補習社大受歡迎，坐享過百萬元年薪，有充裕資金投資樓市，他率先購入大角咀港灣豪庭一個四百多呎的單位。但他形容，起初並不打算炒樓，物業都是自己「送上門」的。「買咗第一個單位之後已經用咗唔少現金，睇另一個一手樓示範單位時經紀話首期可以分六期付款，每月僅供十萬元，真係平到你唔信！」

轉戰「磚頭」揸8單位

於是，林德財買完一個又一個，不知不覺間竟擁有八個單位。他說：「買第三個單位嗰陣仲擔心銀行唔肯借，點知佢三日就批咗按揭畀我，嗰時買樓真係買得好開心，我要逼自己唔再睇示範單位先停到。」

他購入的單位以兩房戶為主，每個單位僅供款四、五年便售出，其中維港灣一個單位的售價更升值逾倍，埋單計數林德財短短數年間靠炒賣磚頭袋走逾千萬元，堪稱隱世樓神！

相信樓價唔會大跌

然而，時移世易，今時今日樓價日日創新高，連樓神都話嚇怕唔買住。「我覺得買樓起碼要有30%溢價先值博，但依家個情況係有價無市，好危險。再等十年八載吧，我會放長線釣大魚，一於同佢鬥長命！」

他指，現時樓價雖已超越九七，絕對冧不了。「好多人用九七樓價做升跌基準，擔心樓市再次爆破，但九七時投機買樓嘅人多，樓價一冧容易出現骨牌效應，相反，依家銀行放貸較為審慎，已經好難好似我以前咁，擁有咁多個樓房按揭。」

「幾年前任志剛話港人個底唔似九七時厚，我唔認同，其實好多業主捱過咗九七，大部分樓房負資產已因樓價升而變正資產，更甚者係手持供斷嘅單位，即使政府再出辣招打壓，業主亦毋須劈價走貨，樓價仲點會跌？」

林德財相信現時樓價高企，買樓獲利水位有限，自己會靜候時機才乘勢出擊。但這段期間他是否翹埋手齋等？

炒恒指窩輪捕升機

以現時市況，林德財稱，寧願轉炒窩輪。「自○八年以來，恒指喺18,000點至24,000點徘徊咗好幾年，但喺環球市場資金充裕下，我睇好今年個市升，等恒指衝破25,000點就買入認購證。」

原來炒樓以外，林德財亦愛炒輪，尤其恒指窩輪。九七年股市狂瀉，林德財一味靠「沽」，在窩輪市場賺到十多萬元。當時，每逢股市大跌小回，林德財即買入認沽證，結果賺到盆滿缽滿。

「我無時間玩正股，窩輪夠短線就最啱我，而大市比個別股容易捉摸，所以我玩恒指窩輪。」講到炒輪心得，林德財話切記「唔好同窩輪談戀愛」，到達20%回報馬上放手，稍有猶豫都會萬劫不復；如睇錯市就應該耐心等候，至平手即走。

實業加炒作互助互補

林德財雖然在金融市場上賺到一大筆，但他認為單靠炒賣過活的風險太高，始終要手握實業才感踏實，所以九二年開始辦補習社，○○年撈埋投資興趣班，及至四年前沾手日本時裝店，身家逾千萬元的他，誓言要實業與炒賣互助互補。

林德財經營的時裝，風格甜美可人，似與他豪邁性格風牛馬不相及，原來他亦是偶然機會下得知如何取得品牌專利權，從而萌生經營時裝店的意念。他對日貨非常有信心，一開便是四間分店。

「好多亞洲人都鍾意日本時裝，一一年某日本牌子喺上海開幕，首日就做咗三百萬人民幣生意，真係商機無限。」四年間，林德財已經投資近四百萬元在時裝店上。

靜待時機入市商舖

他揚言炒賣跟做生意截然不同，前者搵錢雖快，但一失足成千古恨，後者只要成本控制得宜，「蝕極都有個底」。

四年來他不斷摸索，生意漸上軌道。「做生意永遠都係成本最輕時先好賺，當初開四間分店打響名堂，建立熟客群之後，我就大刀闊斧減剩一間樓上舖，人手亦可免則免，先開始『有肉食』。」

但說到節省開支，林德財認為租金始終是關鍵，並大呻當年不炒商舖好笨。「○三年見住北角一個1,000呎左右嘅寫字樓，由98萬炒到依家已經300幾萬，嗰陣無買搞到要捱貴租真係好笨。」所以，林德財話等到下次樓市低谷，一定會「玩埋商廈」。

林德財小檔案

年齡：43歲

職業：現為日本時裝店老闆，並開辦補習社及投資興趣班

平均投資回報：逾20%

近期投資策略：等恒指升破25,000點買認購證

投資金句：投資切忌心急，如果只顧賺錢反而會影響判斷力

時裝店老闆林德財表示，現時樓價過高，相信獲利水位有限，會靜候時機再出手。