60歲甄妮望啤多兩件

甄妮的紅館騷尾場適逢其六十歲牛一，她大爆生日願望是找個伴兼生多兩件，對於在台上講巨肺小肺，矛頭再次指向G.E.M.，她說：「我冇開過名！」

甄妮一連三場的紅館演唱會前晚圓滿結束，圈中老友楊凡、姚煒及甄妮已故丈夫傅聲的哥哥張德熙均有捧場，當晚適逢是她六十歲大壽，台上準備了一個超巨型吹氣生日蛋糕，現場逾萬觀眾更連唱兩次生日歌，令她熱淚盈眶！甄妮完騷後於玻璃門為粉絲簽名，吸引約200歌迷排隊，連黃夏蕙都唔執輸，化身小粉絲索簽名。

自嘲冇人娶

甄妮於台上笑言想環遊世界，且希望搵個伴結婚並生多兩個仔，但於慶功宴受訪時卻表示是講笑：「3個願望都係假，如果我咁都中我就係最Lucky嘅人，依家邊有人敢娶我，成日講到我咁惡！（要囡囡同意？）一定要，個女都成日逼我拍拖！（有冇人追？）都係朋友啦，都冇人傾得埋。」

甄妮早前曾與鄧紫棋（G.E.M.）隔空對罵，問到在個唱中提到的巨肺小肺是否指G.E.M.？她說：「我冇指任何人，冇開過名，唔想再講啲無中生有嘅嘢，要做好自己本分，特別係年輕朋友。」她自爆曾獲G.E.M邀請做演唱會嘉賓，但覺得自己不太合適而拒絕。另外，前晚錄影《勁歌金曲》的G.E.M.，對於甄妮在個唱中矛頭改向曾讚她有禮貌的林欣彤，滿有歉意的她說：「我欣賞每個歌手付出嘅努力。（欣賞甄妮？）佢係神級前輩，唔知呀！」她透露曾邀請甄妮做演唱會嘉賓但被拒，表示一切由公司安排。

音樂組

甄妮於超巨型吹氣生日蛋糕前獻唱，分外有Feel！

甄妮與愛女於慶功宴一同切生日蛋糕。

甄妮為「星級粉絲」黃夏蕙簽名，搞笑！

G.E.M.表示視甄妮為神級前輩！