2012年9月24日星期一

相關內容

初初同對方約會，心情難免會緊張，甚至不知所措，不過咁樣可能會影響你嘅表現！為咗要令對方對你留下好印象，以下事項你一定要留意！

1 ) 注意儀容

- 儀容要整潔。例如：頭髮要梳好、手指甲不要太長、避免指甲油部分地脫落、適當地修剪體毛等等。

- 衣着不要太隨便，並配合約會地方，適當嘅打扮表示你尊重對方。

- 如果唔係有特別嘅dress code，亦都唔好着得太formal或過分華麗，否則對方會覺得你難以親近。

- 唔好化濃妝（尤其係戴大眼仔、黐假眼睫毛），簡簡單單的淡妝，令人睇落精神啲已經夠晒。

- 注意體味，知道自己大汗的話要用止劑。

- 唔好用氣味濃烈嘅香水，唔係個個都受得到。

2 ) 準時出席

．守時係美德，最好比原定時間早5分鐘左右到達，咁樣可以俾自己唞一唞，順便整理儀容。

．如果有突發事件令你必須遲到，應該先打一個電話俾對方，話佢知個情況，唔好要佢白白呆等。

．萬一真係遲到的話，先要同對方道歉，唔好作一堆無謂藉口，令對方覺得你無誠意。

3 ) 注意啖吐

．開始時不妨講一啲輕鬆愉快嘅話題，例如了解一下對方嘅興趣、工作、電影等等。如果大家發掘到相同興趣，自然會有更多話題；如果大家興趣不一，亦可以從中了解對方更多。

．避免係咁抱怨。對方同你約會，都係想過愉快嘅一日，如果你成日喺度抱怨呢樣嗰樣，好似全世界都對唔住你咁，對方又被迫接收你嘅負能量，只會覺得同你一齊唔fun。

．切忌「查家宅」，唔好問埋啲好私人嘅問題，例如經濟狀況、人工、有無車有無樓等等，否則對方只會覺得你係物質女。

．約會的目的係令大家互相認識更多，整個聊天過程都應該係互動的。如果你本身係健談嘅人，千祈唔好bi-li-bla-la自己一個係咁講，喺適當時候都要俾對方發言；如果你本身比較文靜，都唔好十問九唔應，對方講完之後，都應該表達自己嘅想法。

．同對方傾偈時要有適當嘅眼神接觸，而且要有回應，例如點頭示意等，都表示你有用心聆聽，而且係尊重對方，千祈唔好掛住玩手機！

4 ) 進餐時，小心點菜

．起碼要有基本的餐桌禮儀。

．如果你好肚餓，寧願約會前食少少嘢打底，到點菜時唔好點太多份量，以免顯得你好大食；當然也不要刻意扮細食啦！

．切忌點一啲食得麻煩，會令自己失儀嘅食物，例如：雞翼、蝦、蟹等等。

．唔好食咁多令人有口氣嘅食物，例如：蒜頭、洋蔥、咖哩、黑胡椒等，而呢啲食物都有機會粘在牙齒上，有損儀容。

．結帳時，應主動表示要AA制，如果男方堅持請客，講句多謝，話「下次請返你食飯！」或者「陣間我請食甜品！」等等，千祈唔好「老奉」咁認為對方要請你。

5 ) CG! Reminds U:

雖然CG!一向鼓勵大家要「做自己」，但「做自己」都唔代表可以不顧儀態、我行我素，要令對方留下好印象，以上的事項都係要留意的。當然，你亦都唔好將自己完全「改頭換面」，要將自己最可愛的一面展示俾對方睇呀！ : )