如何令心儀的他注意你？

喺公司或者學校，成日撞到心儀嘅佢，但又唔知點先可以同佢有個「好開始」。其實女生唔一定要咁被動坐定定呆等男生來注意自己，以下幾個「零尷尬」嘅必勝招數，大家不妨參考吓。

1. 微笑

你可能會認為你對住佢微笑好樣衰，俾人睇到周圍唱你冧佢，以後唔知點見人。其實真相係：佢只係見到一個女生向自己禮貌地微笑，就係咁多！見到面時，你唔使好似傻瓜咁對住佢大笑，只要正常友善地笑一笑就可以，然後繼續做自己嘢。笑過幾次之後，可以開始同佢自然地打聲招呼、傾閒偈，例如問吓佢weekend去咗邊度玩，讚佢今日件衫幾靚等等，慢慢熟悉大家。

2. 搵出共通點

搵出佢經常流連嘅地方，例如佢鐘意去嗰間餐廳，你就去多啲；佢係學校田徑隊隊員，你就努力啲考入田徑隊。大家喺同一個地方打滾，見多幾次之後，你可以搵個話題同佢好好傾落去。記住要保持眼神接觸，而且唔好一味附和佢，因為男生鍾意啲有腦嘅女生。臨走時講句：「下次再同你傾過！」佢一定會記得你。

3. 好cool咁讚佢

係人都鍾意俾人讚，男生亦唔例外。諗吓佢有啲咩吸引到你（唔係佢有幾靚仔，身材有幾好），然後讚佢。不過千萬唔好太誇太假，咁做好易俾佢發現，要用平時講嘢嘅語氣，好cool咁讚佢。而且最好係搵出一啲其他人睇唔到嘅優點嚟讚，等佢知道你細心嘅一面，咁樣你會俾到深刻印樣佢。

4. 搵個中間人

借助朋友嘅力量，係認識新朋友最容易嘅方法，但你要做得醒目至得。千萬唔好勁心急咁問你個friend：「我好鍾意佢呀，佢有無女友？你可唔可以介紹佢俾我識呀？」呢位朋友會俾你嚇親之餘，分分鐘還會爆俾嗰男生聽，男生知道後可能會感到尷尬甚至反感。較好嘅方法係，隨意地喺朋友面前讚佢，或者暗示「佢份人都幾好玩，做friend應該唔錯。」下次你自己和fd搞活動時，叫埋你個fd同佢，就自然好多嘞！