無綫小生陳展鵬擔正的劇集《心路GPS》收視偏低，但他力撐口碑最緊要，至於年年爭崩頭的「視帝」寶座，他卻直言從不渴望，但求參演有深度的劇，最盼望能拍超時空劇。
無綫劇《心路GPS》最低收視達23點，反應未如理想，不過擔大旗的陳展鵬則力撐劇集有深度，對於無綫最近愛以強姦、裸露戲吸睛，他說：「我哋有反思、反映社會問題。雖然成績係重要，但口碑先最緊要，作為演員都希望拍有深度嘅嘢！開心或爆炸呢啲咩人都鍾意睇，但唔可能套套劇都咁，好多人成日都批評我哋冇教育意思嘅嘢，我哋都要迎合所有觀眾口味。香港觀眾好慢熱，但唔好話大眾唔認同嘅嘢就縮，不斷表達實OK。」
輸贏等閒
愛嘗試新鮮事的他，渴望拍如殭屍片等超時空題材的劇集：「依家拍劇冇咗好似《倩女幽魂》嗰種意境，我覺得可以拍番呢類有空間幻想、超現實嘅劇，其實我已經諗咗兩、三個劇本。（轉做幕後？）我鍾意o架！但太遠唔諗住喇！依家做演員仲有好多嘢要學習同嘗試。」
由亞視過檔無綫的展鵬坦言，大公司收看的觀眾多，意見相對亦較多，故能令他的演技有進步，問到會否想爭視帝？他說：「我冇諗呢啲嘢、亦唔渴望，以前做運動員都冇諗住攞冠軍，當做好自己本分、裝備好自己，自然就會有冠軍，即使輸都心甘命抵，贏咗係個光榮。我目標唔喺呢度，我係諗住拍戲去反映、表達一啲嘢，獎畀到我咪要囉！」
陳展鵬坦言從不渴望爭視帝寶座，只會做好本分。
陳展鵬對於超時空題材的劇集甚感興趣，也喜歡幕後工作。
陳展鵬力撐《心路GPS》口碑好，去年曾與黃翠如等到內地取景。（資料圖片）
沒有留言:
張貼留言