蔡少芬封肚拒追仔

蔡少芬與張晉再次弄瓦之喜，可喜可賀！開刀分娩四日後，她在老公陪同下，帶同呱呱落地的細女張信兒出院。為免再令肚皮受苦，蔡少芬宣布封肚收爐，講明兩個就夠晒數，不用為張家追仔：「張晉已經好幸福，有老婆、二奶同小三！」

現年39歲的蔡少芬（Ada）認真好生養，繼誕下大女楚兒後，本月25日再為張家添多名B女，取名張信兒，完成三年抱兩的艱巨任務。老公張晉前日在微博報喜後，群星紛紛送上祝福，就連國際影星章子怡亦前住醫院探望，可謂畀足面合作多年的老友張晉。開刀分娩四日後，Ada昨午終於可以出院，細心到暈的張晉全程傍實，還與Ada協定不再追仔，正式收爐！

B女重8磅12安士

Ada大女楚兒出世時重達9.4磅，圈中巨B數一數二，而二女信兒同樣噸位十足，重達8磅12安士，難怪孔武有力的張晉把盛載信兒的BB籃帶出醫院時也甚為吃力！安放信兒上車後，張晉折返醫院接老婆出院。現場所見，Ada精神不俗，張晉更笑到見牙唔見眼，恩愛地攬着Ada接受訪問。兩人還提早派兔仔復活蛋，上面印上信兒的名字、出生日期及體重，Ada說：「今胎開刀生，經過上次楚兒後，唔可以再玩催生遊戲，因為上次催生咗12個鐘！」問到誕下細女後是否正式收爐？Ada立即宣布封肚：「係呀！收爐唔玩喇！張家唔使追仔！」問到是否一門三美就夠？在旁的張晉說：「係啦！佢生兩個已好辛苦，佢佗得辛苦，我都攰，佢長時間佗B都頂唔順，有時起身都郁唔到！總之第二次緊張過第一次，BB出嚟先放心，一個女人肚開窿真係唔簡單，所以唔使生喇！」問到如何獎勵老婆？Ada插嘴指着老公說：「當佢奴隸獸，要繼續服侍！其實佢好幸福，有老婆、『二奶』同『小三』！」

楚兒唔畀人抱妹妹

Ada透露大女很錫妹妹，還霸道到只准爸媽抱妹妹，其他姨姨想抱信兒都要打手板！問到楚兒會否呷妹妹醋？張晉說：「一定會！要諗辦法處理呢個問題，大女唔肯瞓，成日問妹妹幾時返屋企。」Ada則一臉滿足地說：「見到咁靚嘅Product出嚟，好開心！人人都話佢似楚兒，大家都嚇親，連醫生都話一樣樣。依家要坐月，會全程陪實BB，休息夠就再努力拍劇！」臨離開醫院之際，Ada再強調這是最後一胎，分娩非常順利，全程保持清醒。因開刀關係，只花了22分鐘便誕下愛女，完成使命。對於好友子怡前來探望？Ada說：「真係好有緣分，打畀佢報喜時，子怡剛喺香港，所以過嚟探我，之後就搭飛機走！」

昨午，Ada再於微博上載一家四口溫馨照，並留言感謝各界祝福。儘管張氏夫婦表明不追仔，可是好友洪欣探望後，卻於微博希望Ada一追再追：「張生張太接二連三再來一個吧！」

專案組

「小三」出院
張晉一手拖蔡少芬，一手拎BB籃離開，現場只能隱約見B女一雙腳仔，未見真面目！

傘陣護女
出院時撞正落雨，張晉出動傘陣為愛女遮風擋雨！

手護傷口
剖腹分娩的蔡少芬見傳媒眾多，出手護肚以免被撞到傷口。

蔡少芬誕下二女出院，吸引不少傳媒採訪。