李亞男願婆媳同住

前華姐李亞男昨日被基督徒好友林淑敏踢爆婚期不遠，亞男笑言計劃數年內結婚，但首先要男友王祖藍置業，又表示不介意與奶奶同住，大讚未來奶奶又型又Friendly。

前華姐李亞男昨日與王敏德及李璧琦宣傳旅遊節目，亞男透露早前到意大利拍攝感覺寫意，有意在當地搞婚禮，問到男友王祖藍是否支持？她說：「佢冇答，只話見我着好少衫好震驚，我着比堅尼，佢叫我小心走光。」

對於好友林淑敏爆她好事近，更笑指祖藍應不介意屆時亞男着高踭鞋，亞男直認計劃數年內結婚，首要條件是祖藍置業：「睇屋交晒畀佢，我想有山有水，兩、三層樓。（地方咁大想生BB？）冇諗咁遠，佢希望同媽咪住。（驚婆媳問題？）佢媽咪好Friendly又有型，好似家姐咁，都識咗七年喇！」

林淑敏取消蜜月

而祖藍接受電台訪問時戲言早前與亞男遊布吉是同房同床：「如果要發生一早發生咗啦！（秘婚？）唔係興去賭城咩？」其後才正經地表示希望兩年內買樓結婚。

另外，林淑敏昨日為維特健靈產品拍廣告，新婚的她說：「個個嗌我陳太，仲未慣。」戰勝癌魔後已復工拍無綫劇的她自信應付得來：「效果OK！（唔做少奶奶？）趁後生搵錢買樓。」她透露與無綫續約後獲加人工，故決定擱置蜜月。

影視組

李亞男大讚未來奶奶有型友善，相信同住冇問題。

林淑敏踢爆李亞男婚期不遠。

李亞男（右起）與王敏德、李璧琦於宣傳活動上狀甚好傾。