賭王何鴻燊的索爆千金超蓮情迷型男俊星，上月被本報獨家披露與台灣型男歌手吳克羣秘戀多時，浪漫「蜜」遊馬爾代夫，更被踢爆同房！母親三太陳婉珍為此慶爆，超蓮返港後當然被剷鑊甘，難怪連日沒精打采！前日下午5時許，超蓮獨自現身中環，心情卻與活潑的粉紅色波點外套成反比，全程頭耷耷未見笑容，一臉落寞，未因熱戀而春風滿面。
未安排見家長
雖然三太因被蒙在鼓裏而嬲爆，但她向來對子女錫到燶，故對「超羣戀」亦態度軟化。前晚，她以第一副主席身份出席東華三院慈善活動，期間表示賭王身體好好並已出院，談及超蓮蜜遊一事，她說：「我冇問，佢有嘢會同我講，冇講即係冇嘢啦！」並揚言不相信女兒與吳克羣同房：「我冇問，都係你哋話，得個傳字！（係酒店職員講。）都冇實質證據！」她透露事前已知超蓮會與一班朋友外遊，但不一定認識所有同行的友人。
問到有否見過吳克羣，三太說：「冇，喺報紙見過。（印象點？）未相處過唔會知。（想唔想見佢？）我唔急。」她指超蓮已21歲，故不緊張其戀事，至於是否贊成「超羣戀」，她態度開始軟化：「依家啲細唔理大人贊成定反對，淨係做自己覺得啱嘅嘢，我只可以從旁勸告，講吓做人道理。」記者指她態度開放，她不禁說：「唔到你唔Open！」似乎已對「超羣戀」開綠燈。
聽歌鋪路「入門」
而超蓮已為男友「鋪路」，讓媽咪聽他的作品，三太亦表示以後會多留意對方：「依家會留意多啲，但我出年做東華三院主席，應該更加冇時間。（搵吳克羣表演？）好提議，我會諗諗。」明顯愛屋及烏！相信超蓮終可放下心頭大石，不用再頭耷耷咁愁了！
因瞞住媽咪拍拖而被「炳鑊甘」的超蓮，擔心被棒打鴛鴦，日前出街時頭耷耷冇厘心機。
三太自言Open，不會反對女兒拍拖，只會從旁給予意見。
超蓮外遊期間上載自拍照，被揭與男友吳克羣同遊馬爾代夫。（資料圖片）
三太向來疼錫超蓮，鬧還鬧，最終還是開綠燈讓她拍拖。（資料圖片）
台灣型男歌手吳克羣睇得又唱得，難怪迷倒賭王千金！
沒有留言:
張貼留言