如何對付大男人/小男人的男友？

相關內容

• 查看相片
  如何對付大男人/小男人的男友？

就算你幾愛男友都好，對方總會有啲性格令你覺得難頂，例如佢好大男人，或者佢係小男人，呢兩種男生都好易令人抓狂，想佢哋改變並唔容易，但只要運用精明眼、小智慧同無成本嘅EQ，就可以令男友本人同生活變得更可愛！

大男人篇：

大男人就好似香港腳一樣難以根治，只能抑制同紓緩，想同佢哋和平相處並非全無可能，只要記住：咩都可以做，就係唔可以同大男人硬碰硬。

＊同大男人相處嘅第一道板斧就係「俾面」。如果你令一個大男人感到「無面」的話，佢會義無反顧地離開你，其他嘢根本就唔使再傾。

＊大男人愛面子多於一切，如果你可以將你嘅需要同佢嘅尊嚴掛鈎，例如你打扮得靚即係代表佢有能力，佢一定會盡量滿足你。

＊劈頭劈面咁話佢蠢，佢鐵定同你反面，所以要有技巧地提點佢，例如你可以用請教佢嘅語氣話：「你個方法都好好，唔知可唔可以咁咁咁嘅呢？俾啲意見我吖。」等佢覺得自己好聰明。

＊大男人唔鍾意聽人「支笛」，最好嘅做法係俾佢feel到「有得揀」，例如同佢提議幾個食飯地點，然後「誘導」佢揀你嘅心水選擇。

＊「呢樣嘢最啱你呢類要求高/品味獨特嘅人」對大男人嚟講非常受用，做佢嘅口味代言人，一來既滿足到佢嘅虛榮心，二來真正話事嘅其實係你。

小男人篇：

小男人比大男人棘手，大男人尚且受軟唔受硬，小男人則軟硬都唔受：你用硬佢就變軟皮蛇，你施軟功佢就攞你便宜。所以，做小男人身邊嘅女人需要有高度嘅耐性同智慧。

＊面對小心眼嘅佢，你表現大方，佢並唔會被同化，只會佔你便宜。試下「以毒攻毒」，比佢更加斤斤計較，機關算盡令佢走投無路。

＊以利益誘導佢，令佢相信今日對人慷慨啲，聽日嘅回報一定豐厚。就算佢唔會變得大方，起碼都會變得計少啲。

＊小男人怕事、怕上身、怕負責任，因為佢哋最怕損失。咁就等佢試下不負責任所招來嘅損失其實更加嚴重，兩害取其輕，佢會揀損失較小嘅做法。

＊小男人同大男人一樣愛面子，佢哋種種小器嘅表現，都係自尊心作祟，你令佢覺得被尊重，自然事事好商量。

＊當佢表現出色嘅時候，俾啲讚賞佢，小男人比大男人更需要「正面鞭策」。