獨家無悔剖白 險抑鬱才拒演春嬌 王菀之：期待拍情慾戲

※王菀之認為靚聲緊要過一個好角色，對於千嬅憑《春嬌與志明》內的余春嬌一角奪影后，「我真心戥千嬅開心！」 ※張志明同余春嬌深受觀眾歡迎，相信系列長拍長有。 ※首奪影后的千嬅在台上又喊又笑，唔覺意自爆春嬌一角是執二攤。 ※其實王菀之可塑性好高，在《老表你好！》中完全表露無遺。 ※晴晴一角令Ivana深得師奶觀眾歡迎，她跟肥妹陳嘉佳及與鬼妹陳明恩到街頭宣傳，市民反應極熱烈。

2013年4月17日 　　楊千嬅憑以「姊弟戀」為題的電影《春嬌與志明》踢走鄭秀文等成為本屆金像獎影后。得獎後，千嬅又喊又笑真情流露，一時忘形漏了嘴，自爆余春嬌此角是執二攤，導演彭浩翔的First Choice另有其人！原來將肥豬肉拱手相讓給千嬅的正是王菀之（Ivana）！Ivana重提此事帶點耿耿於懷：「當時聲帶出毛病，對一個歌手講，聲帶壞就等於玩完，我差抑鬱，心情好差，雖然失去一個好好機會，但我無後悔！我會戥千嬅開心！」　　採訪：方騫平　攝影：李權威服裝：EDIT　形象：Tang Lai　化妝：Milk Yuen髮型：Kate Shek @ Hair Culture 　　2010年，行運千嬅執王菀之（Ivana） 二攤拍《志明與春嬌》，戲中做番自己，將「姊弟戀」的不安曖昧神髓演繹得淋漓盡致，造就了她登上影后寶座之路。另一邊廂，有指王菀之計錯數，不肯接《春嬌與志明》是放不低歌手身份，因電影題材好敏感，講吸煙，又多粗口，走型格音樂人路線的她接受不到！Ivana對外間的一切誤解有話要說，並詳細向本報交代事情始末！ 失聲險抑鬱 　　她說：「前年正值唱片宣傳期，因為聲帶長期勞損出現大問題，唱唔到歌，講發唔到音，接受訪問時大家都聽唔到我講，就算同父母出街，我都係靠筆談，雖未致於去到抑鬱階段，但真係有3千倍不快樂，最憎仲要應付工作，連同事都冇面畀，對住佢黑口黑面，情緒極度低落，因為對一個歌星講，把聲壞就玩完，冇傷心得過呢件事，一定要盡快治瘉。當時，同彭浩翔導演了解過劇本後，知道『春嬌』係吸煙人士，在醫生勸喻下為免令聲帶更加惡劣唯有推戲，時也命也，只好自我安慰：『醫好之後，長遠講，日後仲有大把好機會啦！』可幸，經幾個月治療，終於好番，家陣靜待下個好機會來臨。」 　　拍戲無底線 　　談到彭浩翔有意開拍春嬌系列電影第三集，故事還希望加入張志明的父母角色，製造兩代在生活和文化上的差異，父母人選彭導屬意曾拍經典電影《秋天的童話》的周潤發和鍾楚紅。Ivana坦言唔敢撈：「同前輩演員好似王祖藍、修哥（胡楓）、郭晉安  合作，除演技外，係佢身上仲學到好多，如做人道理，我演技好嫩，唔敢奢望同發哥合作，但如果有強勁卡士同班底，梗係好啦！呢方面交畀經理人公司安排啦，就算他日接拍第一部電影，我都唔會set定演出底線，冇諗過唔接吸煙、情慾戲，一切按劇本而定，希望未來唔單止歌壇上獲獎，就算舞台劇、影壇、電視界都得到好成績。」 　　接下來Ivana歌、視機會接踵而來，在TVB劇《老表，你好！》中晴晴表妹破格演出，令人氣急升！Ivana更以大使身份，將於7月14至19日為「2013香港國際青少年合唱節（第四屆）」演出，到時會跟來自芬蘭的合唱團合唱兩首歌，一首是芬蘭歌，一首是她的《畫意》，用超靚聲來個大比併。