3招暗追心儀男生

傳統女生會話：「女仔要有矜持㗎！太主動，男仔唔珍惜！」但現代女生又會同你講：「愛情，當然要自己爭取！」到底答案係咩？呢度有幾招獨門秘技，教你唔使咁出面、暗啞底追到男生。

秘技一：增加自己曝光率

或者好多勇敢嘅女生會問：「我鍾意個男生，點解唔可以主動約佢？」原因係，男生都享受追女仔嘅刺激過程，反而一次偶遇，會啟動佢腦內嘅浪漫中樞。

所以，高招嘅女生都識得製造驚喜嘅偶遇場面，當你哋兩個多咗獨處時間，佢就會無咁怕醜，覺得你有親切感！

以下有幾招值得參考：
‧去佢經常出沒的地方，例如學校canteen、圖書館、佢買早餐嘅地方。
‧真係碰見了，大方主動打招呼，打開話題，例如主動少少講下近期嘅電影、問一啲佢實識解答你嘅嘢。
‧提議你個friend搞返個party或gathering，順便約埋佢一齊玩。

秘技二：唔使過分熱情

好多女生以為勁講自己點點點，就會博到男生嘅信任。其實男生都鍾意少少神秘感，你只要俾佢知道你對佢有啲興趣，但又未至於會飛撲埋身，就會成功吊住男生嘅癮，令佢想知道你更多。

所以，千祈唔好迫佢埋牆，或者迫佢聽你嘅生平事跡，盡量保持對話精簡，俾多啲air time佢表達自己。

秘技三：堅持3次機會

堅守「3次唔得就叮走」嘅原則，假如暗示咗3次，男生都無表示，就要放棄。

俾自己一條死線，可確保自己唔會投資太多感情，防止泥足深陷。況且你已經盡力做到最好，就算唔work，你大可以同自己講：「車，係佢嘅損失」，然後瀟灑地走人。咁樣做，你就唔會覺得自己被拒絕而feel bad。

注意：小心曖昧男生

追男仔最難搞嘅地方，就係你越緊張能唔能夠成事，你越係當局者迷，睇唔清楚對方係咪真係有意思。

男生並無你想像中咁遲鈍，當佢發現竟然喺街撞到你一萬次，你又不斷俾signal佢，無咁好品嘅男生，好有機會做埋啲曖昧行為，但又唔係有心同你發展。

所以你要分清楚work同唔work，大部分男生如果對你有意思嘅話，都會喺頭三次機會內開始攻勢。假如佢遲遲未採取主動(包括約你出街或主動call你)，代表佢對發展呢段感情興趣不大。

女生放膽去暗追男生嘅時候，要明白勉強無幸福，將感情留俾同你有相同感覺、值得你愛嘅男生先至啱！